04:06 - 22 Jun, 2018
2018-05-23 15:07:01, 870 ნახვა
„რუსეთს საქართველოს წინააღმდეგ არგუმენტები არ ჰქონდა“ - სტრასბურგში პროცესი დასრულდა

სტრასბურგის სასამართლოში 2008 წლის აგვისტოს ომის საქმეზე სასამართლო პროცესი დასრულდა.

ადამიანის უფლებათა ევროპული სასამართლოს პრეზიდენტმა გვიდო რაიმონდიმ განაცხადა, რომ გადაწყეტილების თაობაზე მხარეებს წინასწარ ეცნობება, თუმცა როდის, არ დაუკონკრეტებია.

როგორც პროცესის დასრულების შემდეგ იუსტიციის მინისტრის მოადგილემ, გოჩა ლორთქიფანიძემ განაცხადა, რუსეთს საქართველოს წინააღმდეგ არგუმენტები არ ჰქონდა.

„ის რაც დღეს სასამართლოში მოვისმინეთ მოწინააღმდეგე მხარისგან ნიშნავს იმას რომ რუსეთს საქართველოს წინააღმდეგ არგუმენტი არ აქვს!“, - განაცხადა ლორთქიფანიძემ.

სახელმწიფოთაშორის დავას სტრასბურგის სასამართლოს დიდი პალატა განიხილავს, რომელიც 17 ქვეყნის, მათ შორის, საქართველოდან და რუსეთიდან არჩეული მოსამართლეებითაა დაკომპლექტებული. დიდ პალატას ადამიანის უფლებათა ევროპული სასამართლოს პრეზიდენტი გვიდო რაიმონდი თავმჯდომარეობს.

შეგახსენებთ, 

აგვისტოს ომის საქმეზე საქართველო რუსეთს ადანაშაულებს ევროპული კონვენციის 8 მუხლის დარღვევაში, კერძოდ, საქართველო მიიჩნევს, რომ რუსეთმა ომისა და შემდგომი ოკუპაციის დროს დაარღვია ევროპული კონვენციის შემდეგი მუხლები: სიცოცხლის უფლება (მე-2 მუხლი); წამების, არაადამიანური ან ღირსების შემლახველი მოპყრობის ან დასჯის აკრძალვა (მე-3 მუხლი);თავისუფლებისა და უსაფრთხოების უფლება (მე-5 მუხლი); პირადი და ოჯახური ცხოვრების დაცულობის უფლება (მე-8 მუხლი); სამართლებრივი დაცვის ქმედითი საშუალების უფლება (მე-13 მუხლი); საკუთრების დაცვა (1-ლი დამატებითი ოქმის 1-ლი მუხლი); განათლების უფლება (1-ლი დამატებითი ოქმის მე-2 მუხლი); მიმოსვლის თავისუფლება (მე-4 დამატებითი ოქმის მე-2 მუხლი).

რუსეთ-საქართველოს ომის საქმის არსებით მხარეზე წერილობითი პოზიციები  და შესაბამისი მტკიცებულებები საქართველომ პირველად წარადგინა 2014 წლის 31 დეკემბერს, ამის შემდეგ დამატებით − 2016 წლის 19 თებერვალს და 31 მარტს,  2017 წლის 31 იანვარსა და 24 ნოემბერს. სახელმწიფოთაშორისი საჩივარი სტრასბურგში  2008 წლის 11 აგვისტოს შევიდა, 2009 წლის 6 თებერვალს კი, საქართველომ წარადგინა დაზუსტებული საჩივარი; სტრასბურგის სასამართლომ 2011 წლის 13 დეკემბრის გადაწყვეტილებით საქართველოს საჩივარი მისაღებად ცნო, არსებითი მხარის წინასწარი გადაწყვეტის გარეშე.



სოციალური ქსელები
კომენტარები



თბილისში ქუჩის მხატვრობაზე ჯარიმები შესაძლოა გაორმაგდეს
ქუჩის მუსიკოსებისთვის სანქციები არ დაწესდება
დღეს სელფის საერთაშორისო დღეა

არქივი 2009 წლიდან

303,563
უნიკალური
ვიზიტორი დღეს 27,104
Powered By Google Analytics